Uchunguzi Kisemiotiki wa Athari za Kihistoria na Kimazingira kwa Uchumi na Maisha ya Kijamii katika Pwani ya Kenya

Abstract

Makala hii inachunguza athari za kimazingira kwa jamii za pwani ya Kenya tangu karne ya 18 walipokuja Waarabu, Waingereza kuanzia 1895 hadi sasa baada ya Kenya kupata uhuru. Ili kukuza mjadala, makala hii ilifafanua ishara na tamathali za lugha zinazohusu mazingira katika semi na ushairi wa Kivumba kwa kutumia nadharia ya semiotiki. Uchunguzi ulijikita katika misimbo ya Barthes (1957) ya kiseme, kiishara na kirejelezi kwa kutumia mbinu ya kimaelezo. Kufafanua tamathali za lugha pamoja na ishara katika matini za kifasihi ni njia bora ya kudhihirisha ujumbe unaowasilishwa kwa msomaji wa kifasihi (Bradford, 1997; Wamitila, 2003; Wales, 2011). Makala hii inajadili kwamba, semi na ushairi kama vipengele vya fasihi simulizi, vinaweza kuwa chombo mbadala cha kuainishia taswira kamili kuhusu athari za muda mrefu za kimazingira kwa jamii za pwani ya Kenya. Makala inahitimisha kwamba, Athari za kimazingira kwa jamii za pwani ya Kenya ni dhahiri na suluhu ya haraka inahitajika. Wengi wanaishi kwa umaskini na kukosa maslahi ya kimsingi kama maji ya kunywa. Kuna uhaba wa chakula na ndoa zimeathirika. Maeneo mengi vilevile yanashuhudia mafuriko ya mara kwa mara na ajira haipatikani.